الجمعة، 18 مارس، 2011

دليلك لصوتك . كلام من الآخر


ها هتصوت بنعم ولا لأ؟   نعم؟   طب ليه؟  ايه بتقول لأ؟   طب لأ ليه؟

بص أنا بصراحة احترت زيك بالظبط, في الأول قلت هصوت نعم لقيت ناس لأ بيقولولي ده ترقيع في الدستور و التفاف على الثورة و خيانة لدم الشهدا و عايزيين نبدأ صح و بيني و بينك معاهم حق. خلاص أنا هقول لأ. لقيت الناس بتوع نعم بيقولولي لأ هتودينا لفوضى و نعم هي أقصر طريق للاستقرار و الأمن و كمان عشان الجيش يروح بيته, وماخبيش عليك أنا حاسس برضه ان معاهم حق.

أووووفـــــــــــفف حاجة بجد تحير أنا خلاص بشد في شعري, كان مالنا احنا و مال حرية الرأي و الديمقراطية و الكلام المجعلص ده!. المهم دلوقتي ده أمر واقع و أنا لازم أقول رأيي عشان ما ابقاش سلبي, وعشان أنا عارف انك محتار زيي تمام قررت اني اساعدك و عايزك انت كمان تساعدني عشان نعرف المفروض نقول نعم ولا لأ ربنا يعدي اليوم ده على خير.

هما يدوبك 12 سؤال هتجاوبهم و قبل ما توصل لآخرهم هتكون عرفت المفروض تقول ايه, وإذا كنت فعلا قررت بس لسة محتار شوية برضة جاوب على الأسئلة و هتتأكد إذا كان قرارك صح ولا غلط و إذا كنت قررت و متأكد و مش محتار يبقى نفض للأسئلة و دوس "باك" و ماتضيعش وقتك.

دليلك لصوتك:

1)          هل أنت من المنتمين أو المنتفعين من الحزب الوطني؟
نعم :      صوت بـنعم
لا:         انتقل للسؤال التالي

2)          هل أنت إخوانجي؟ يعني من الأخوان المسلمين؟
نعم:       صوت بـنعم
لا:         انتقل للسؤال التالي

3)          هل أنت مسيحي؟
نعم:       صوت بـلا
لا:         انتقل للسؤال التاني

4)          هل تحسب نفسك سلفيا أو من المتعاطفين مع الجماعات الإسلامية؟
نعم:       صوت بـنعم
لا:         انتقل للسؤال التالي

5)          هل كنت من المعارضين للثورة أو تمنيت ولو للحظة أن تنزل نار من السماء و تبتلع شباب التحرير؟
نعم:       صوت بـنعم
لا:         انتقل للسؤال التالي

6)          هل أنت من المعجبين بالبرادعي و سوف تعطيه صوتك في الانتخابات القادمة؟
نعم:       صوت بـلا
لا:         انتقل للسؤال التالي

7)          هل ترى الدولة المدنية تتعارض مع الدين؟
نعم:       صوت بـنعم
لا:         انتقل للسؤال التالي

8)          هل قلت يوما ما من قلبك " أنا آسف يا ريس " ؟
نعم:       صوت بـنعم
لا:         انتقل للسؤال التالي

9)          هل تمنيت أن يبقى الفريق أحمد شفيق ليدير البلاد في المرحلة الانتقالية؟
نعم:       صوت بـنعم
لا:         انتقل للسؤال التالي

10)          هل تقر بضرورة تدخل رجال الدين في الحياة السياسية؟
نعم:       صوت بـنعم
لا:         انتقل للسؤال التالي

11)          هل تعارض أن يصير قبطيا أو امرأة رئيسا للجمهورية؟
نعم:       صوت بـنعم
لا:         انتقل للسؤال التالي

12)          هل كل اجاباتك السابقة كانت لا؟
نعم:       صوت بـلا
لا:         مش ممكن!


يا جماعة أنا عارف ان الكلام دمه تقيل بس للأسف شايف ان ده الواقع. ياريت لو سمحت بلييز يعني من فضلك لو كانت نتيجة اجابتك عن الأسئلة عكس نيتك في التصويت تقولي عشان احس ان انا غلطان.

و الله الموفق و المستعان

ليست هناك تعليقات:

إرسال تعليق